အိမ်ဘေးက ခြံစည်းရိုးအဟောင်းလေးရယ်၊ မန်ကျည်းပင်အိုကြီးရယ်ကို ကြည့်ပြီး ပုံတူ ပန်းချီဆွဲနေမိတယ်၊ ခဲပန်းချီလေ။ လှတယ်ထင်လို့.. ဒီမြင်ကွင်းကို ၀ါသနာအရ ဆွဲကြည့်နေတာပါ..... ကောက်ကြောင်းလေးတွေ အရင်ဆွဲကြည့်မယ်၊ ပြီးရင်...ရှိတ်လေးတွေ ဆွဲမယ်၊
ဒီထက်ပိုအဆင်ပြေရင်တော့ အကိုင်း၊ အခက်၊ အရွက်လေးတွေပေါ့..... အလင်းနဲ့ အမှောင်ထည့်ဖို့ ကတော့ ခဲများများ ဖို့လိုက်ရုံပဲ၊ ခက်နေတာက အရွက်လေးတွေကြားထဲက အလင်းရောင်ကို ဘယ်လို ထည့်ရမလဲ မသိတာ..... အကြမ်း ဆွဲကြည့်နေတာလဲ များလှပြီ အဆင်မပြေဘူး၊ စာရွက်တွေလဲ လုံးခြေထားလို့ အလုံးလိုက်လေးတွေ များလှပေါ့.....
သဇင်နဲ့ ကျွန်တော် ချစ်နေကြတာကို မေမေ သိထားတယ်၊ သိပ်သဘောမကျဘူးဆိုတာ မေမေ့အကြည့်တွေ ကတဆင့် သိခွင့်ရထားတယ်၊ ဘာမှတော့ မပြောပါဘူး၊ ကျွန်တော်က စိတ်ချရတဲ့ သားတစ်ယောက်ဘဲလေ........ ခက်နေတာက သဇင်ဘဲ သူငယ်ချင်းတွေလဲ ဖြစ်ခဲ့တော့ အိမ်ကို ရံဖန် ရံခါ လာလည်တတ်တယ်၊ မေမေ့ကို အဆင်ပြေအောင် မကြိုးစားဘူး၊ ယို့ကျိုးခြင်းလဲမရှိဘူး၊ ခပ်တည်တည် မျက်နှာထား တင်းတင်းနဲ့ ...... ကျွန်တော် လဲသိတယ်၊ ခက်နေတာက ကျွန်တော် ချစ်နေ တာပဲပေါ့......
တစ်နေ့တော့ မေမေက ပြောလာတယ်၊ သဇင့် မျက်လုံးတွေက မရိုးသားဘူးနော်၊ င့ါသား ငတုံးလေး သတိ ထားပါတဲ့ ကျွန်တော် ဘာမှ ပြန်မပြောဖြစ်ခဲ့ပါဘူး၊ မေမေကသူ့အတွေ့အကြုံအရတစ်ခုခုကို မြင်နေတာလဲဖြစ်မှာပေါ့လို့ တွေးဖြစ် ခဲ့တယ်။ ကျွန်တော် သိသလောက်ကတော့..... အခုထိ မရိုးသားမှု ဘာမှ မရှိခဲ့ပါဘူး.........။
ကျွန်တော် တွေးမိတယ်၊ သဇင်နဲ့ အတူနေဖြစ်ရင် မေမေ့အိမ်မှာ နေဖို့ ခက်မယ်လို့လေ၊ သဇင်ရဲ့ ဒီပုံစံနဲ့ အဆင် မပြေရင် ကြာရင် ကျွန်တော် စိတ်ညစ်ရတော့မယ်၊ ဒီတော့ ကိုယ်ပိုင် အိမ်ခန်းလေး ဖြစ်ဖြစ်တစ်ခုတော့ရအောင်လုပ်ရတော့မှာပေါ့..... (၂)နှစ်အတွင်း ရဖို့အတွက် စီမံချက်တစ်ခု ချပြီး ကျွန်တော် အလုပ်ထွက်လုပ်ခဲ့တယ်၊ လခစား ဘ၀နဲ့ တော့ အဆင်မပြေနိုင်ဘူးလေ၊ နယ်စပ်ကို သွားပြီး ကုန်သွယ်ရေးလုပ်ငန်းကို အစုစပ် လုပ်ကြည့်တယ်၊ ထိုက်သင့် သလောက်တော့ အဆင်ပြေပါတယ်။ ဒီနှုန်းနဲ့ ဆိုရင်တော့ ထင်တာထက်ပို အဆင်ပြေမယ်လို့တွေးရင်းကြိုးစားနေဆဲပါပဲ၊ သဇင့်ကိုလဲ လွမ်းရင်း ..........
ဒီနေ့ လုပ်ငန်းကိစ္စနဲ့ ကျွန်တော် ရန်ကုန် ပြန်ရောက်လာတယ်၊ သဇင့်ကိုတွေ့ချင်လှပြီ..... ..အိမ်ကို အရင် မပြန်ဘဲနဲ့ သဇင့်ဆီကို တန်းလာခဲ့တယ်၊ ဖုန်းတောင်မဆက်ဖြစ်ဘူး၊ သဇင်ပျော်သွားအောင်လို့လေ........ နောက်ပြီး ကျွန်တော့်ရဲ့ ရည်ရွယ်ချက်လှလှလေးကို ပြောပြမလို့.....၊ ဒီနေ့ တနင်္ဂနွေနေ့ ဆိုတော့ တစ်နေကုန် လျှောက်လည်မယ်၊ ညနေမှအိမ်ပြန်မယ်လို့.... ... တွေးတော့တွေးမိသေးတယ် မေမေ နေကောင်းရဲ့လားလို့လေ......။
သဇင်အိမ်မှာမရှိဘူး၊ အပြင်သွားတယ်တဲ့.......ဒီနေ့အလုပ်ပိတ်ရက်ပဲ .ဘယ်များသွားပါလိမ့်လို့ တွေးရင်း ဖုန်းဆက်ရတော့တာပေါ့.....တွေ့ချင်လှပြီလေ....၊
(၁)နာရီကျော်ကျော်လောက်ကြာမှ သဇင်ပြန်ရောက်လာတယ်၊ အရင်နဲ့ မတူ ခေတ်မီလှပနေလိုက်တာ.... အလုပ်ရှင် အိမ်မှာ အလှူလုပ်လို့ သွားဝိုင်းကူနေတာတဲ့....ဖုန်းလေးဘာလေးကြိုမဆက်ဘူးလို့ ကျွန်တော့်ကို အပြစ်တင်နေသေး တယ်ပြုံးပြီးတော့လေ.....ကျွန်တော်လဲ အသဲယားလာတာရယ်၊ လွမ်းနေတာရယ်၊ အိမ်မှာ လူရှင်းနေတာရယ်ကို အခွင့်အရေးယူပြီး ပါးလေးကို ဆပ်ခနဲ မွှေးလိုက်တယ်.........။
မေမေပြောတာ မှန်သွားပြီ ..........ထူးဆန်းတဲ့ အနံ့တစ်ခုရတယ်၊ မိတ်ကပ်အကောင်းစားတွေ၊ ရေမွှေး အကောင်း စားတွေ ကြား ထဲက စီးကရက်နံ့........ ကျွန်တော် ဆေးလိပ်မသောက်ဘူးလေ.........
ဘာပြောရမှန်းလဲ မသိ၊ ဘယ်လိုနှုတ်ဆက်ရမှန်းလဲ မသိတော့ဘူး၊ သဇင်ကတော့ မေမေပြောတဲ့ မရိုးသားတဲ့ မျက်လုံးတွေနဲ့ ချစ်ချင်စရာကြည့်နေတယ်...ကျွန်တော် အဝေးကြီးကို လွင့်သွားသလို ခံစားနေရတာတော့ သိတယ်၊ ကျန်တာတော့ ဘာမှ မမှတ်မိတော့ဘူး....ဘာတွေများပြောခဲ့မိပါလိမ့်မလဲ....။
အိမ်ဘေးက ခြံစည်းရိုးအဟောင်းလေးရယ်၊ မန်ကျည်းပင်အိုကြီးရယ်ကို ပုံတူ ပန်းချီဆက်ဆွဲမယ်........... ခဲပန်းချီပေါ့.. .. .. ၀ါသနာအရဆွဲကြည့်နေတာပါ..... ကောက်ကြောင်းလေးတွေ အရင်ဆွဲပြီးပြီ၊ ရှိတ်လေးတွေလဲဆွဲပြီးပြီနောက်ထပ်
အကိုင်း၊ အခက်၊ အရွက်လေးတွေရယ်.. အလင်းနဲ့ အမှောင်ထည့်ဖို့ ကတော့ခဲများများဖို့လိုက်မယ်၊ ခက်နေတဲ့ အရွက်လေးတွေကြား ထဲက အလင်းရောင်ကို ဘယ်လို ထည့်ဖို့ အကြမ်းဆွဲကြည့်နေတာလဲအဆင်မပြေတာလေးတွေကို ချန်ထားခဲ့တယ်လေ၊ အလင်းရောင် ထည့်ရမဲ့ နေရာမှာ မဆွဲဘဲချန်ထားခဲ့တယ်၊ ပြီးမှ ဘေးကနေ......ရှိတ်လေးတွေဖို့လိုက်ရင်....အလင်းရောင်လေး သေသေချာချာ ပေါ် လာမှာပေါ့....... လွယ်လွယ်လေးကို ကျွန်တော် တော်တော်ခက်ခက်ခဲခဲ စဉ်းစားနေမိတာဘဲ......
ဆွဲပြီးသွားရင်တော့ ဒီပုံလေး တော်တော်လှလိမ့်မယ်၊ အချိန်တွေနဲ့.... အင်အားတွေ အများကြီးသုံးခဲ့ရ တာလေ.... နောက် အသိတရားလေးနဲ့ ပေါင်းစပ်ထားလို့၊ အလှဆုံးကတော့ ကံတရားကြောင့်လဲ ဖြစ်မှာပါ........လို့။
No comments:
Post a Comment